ذكريات من حياة الفنانة مها ابو عوف

مها ابو عوف 

 امها من اصول سورية وتركية .. وابوها أحمد شفيق أبو عوف، خريج الكلية الحربية، وظابط جيش، بس ليه ميول فنية، شارك في إنشاء أوركسترا القاهرة السيمفوني، وفرقة المسرح الغنائي، وفرقة الموسيقي العربية مع عبد الحليم نويرة.. 

 وكان بيقدم برنامج تلفزيوني اسمه “مع الموسيقي العربية” وليه لقاء شهير مع سامية الاتربي بيحكي قصته بين الجيش والفن 

اب غاوي فن طبيعي ابنه يطلع غاوي مزيكا .. ابنه عزت … كان مشارك في فرقة”بلاك كوتس” وكان مؤسسها إسماعيل الحكيم ابن الكاتب الكبير توفيق الحكيم…  ومن أعضائها عازف الجيتار عمر خورشيد، ومجدي الحسيني (جوز نهال عنبر)، وطلعت زين… لكن الفرقة انهارت الفرقة بعد وفاة إسماعيل الحكيم… اللي مات في عز شبابه نبقى نحكي قصته في بوست منفصل. 

وبعدها أسس عزت ابو عوف فرقة الفور ام .. اللي اتكونت من اخواته البنات الاربعة .. وهما “منى، مها، منال وميرفت”، وكلهم بيبدأ اسمهم بحرف الام .. وبعد كدا منى هتتجز وتحل بدالها مريم .. الفرقة كانت تقريبا اشهر فرقة غنائية في التمانيانات لكن في التسعينات .. الدنيا بدأت تهدا .. فاتحلت الفرقة .. الموسيقى اصله بتتجدد كل فترة ولازم يطلع ناس جديدة باشكال غنا جديدة .. وكل اعضاء الفرقة سابوا الفن .. ما عدا عزت ابو عوف ومها ابو عوف.. اشتغلت مها في الاول مذيعة في التلفزيون لفقرة التمارين الرياضية .. وبعدين اتجهت للتمثيل.. 

 مها اتجوزت من عمر خورشيد … وكانت الزوجة الرابعة والاخيرة ليه .. لانه مات او قُتل بعدها علطول .. مها نفسها شايفة ان جوزها اتقتل بشكل مدبر.. لما مات جوزها اكتشفت انها حامل .. لكن ربنا ما اراداش للجنين يكمل .. وفقدت الجنين. 

 اتجوزت بعد عمر خورشيد .. وفضلت سنين تحاول تحمل .. والدكاترة قالولها مستحيل تحملي .. وفضلت تحاول 15 سنة .. 

وقالت مها: “انفقت أموالا طائلة، وسافرت دولا كثيرة لإجراء الفحوصات والتحاليل، لكي أحقق حلم الإنجاب، إلا أن كل طبيب يفحص حالتي كان يؤكد لي إنه من المستحيل الإنجاب، «في إحدى المرات، تمهلت وتوقفت عن حلم الإنجاب، وقلت لنفسي: ربنا لو عاوزني أحمل هيعمل كده هو قادر على كل شيء، وفوجئت ذات مرة أن الطبيب يُخبر شقيقي عزت بأنني حامل، وكان يشعر بحالة من الذهول آنذاك”.

وبتقول ان كان معاها عزت ابو عوف، فـ الدكتور قالها “الدكتور قاله: أختك مستحيل كانت تبقى حامل، وفقا لكل اللي درسناه في الطب.. بس حالتها دي هتخليني عمري ما أقول لواحدة إنك مش هتحملي، والدكاترة خافوا يولدوني طبيعي وعملت عملية عشان ميحصلش أي حاجة للمولود وقتها”. 

 الدكتور كتب في شهادة ميلاد ابنها شريف : “سبشيال بيبي، لانه كان عاجز عن معرفة أسباب حملها رغم حالتها”.. 

أصيبت مها بالسرطان، وفضلت تتعالج منه في صمت، لحد ما ماتت النهاردة الصبح ، 6 يناير 2022، بعد تقريبا 3 سنين من وفاة اخوها عزت ابو عوف.. 

الله يرحمهم جميعا..